今日碧祺姐姐終於見到我咁“忙”頂唔住，去左Ryan哥哥度搵嘢俾我做（唔該哂呀碧祺），終於可以過返一日“充實”嘅生活喇。

放工後Benny，沙律同高比都過左嚟一齊食飯，我同Benny應該好耐無見，佢一見我就過我個頭似叱吒方大同攞獎時個頭（我無睇電視，都唔知咩樣）。

我哋去左「大長今」食韓燒，呢度係唔駛自己燒的，全程有專人服侍，D食物就OK啦，最好味係D牛肉同個雞湯。 走時發生左一件好攪笑（慘）嘅事，因為「大長今」嘅坐位有部份係需要除鞋坐低食，當我哋走時，沙律發現佢對鞋唔見左，原本佢係一對低筒黑色Converse，但現場只係剩返一對高筒黑色Converse。應該係早前其他枱嘅人離開時著錯鞋走左，沙律又唔開心係咁話點算，因為留低個對比佢原身細左一個碼，都明點解D人可以睇都唔睇同著左走人。雖然佢好慘，但我哋個個郤笑到趴地。最後沙律以 09年春夏最潮嘅著法「高筒踩踭」同我哋一齊行去「Cold Stone」食雪糕。

今晚係4日來最早一晚返到Apartment，睇新聞見到有第一間金融機構以原價向雷曼迷債嘅顧客回購債券，睇完覺得雖然有部份嘅人係好慘，但始終當時購買時係你情我願，咁樣都可以以全數攞返錢，佢哋咩責任都唔需要負責，開左一個先例，將來再有同類事情真的不知怎算。